2025
Lueget wie’ s schtürzt vo Bärge und Daal
D Strooss unter Wasser, Raise wird zur Quaal
Mir blyybe uff em Balggong und schpiile um d Wett
Wär gseet am Himmel mee Easytschett?
Är isch schlau – ä Rächte und Nätte – zu de Lüütt
Träumt vo Autobaane und AKW – no hütt
Dää Röschti wird jetzt no als Gwafföör prämiiert
No kaine haig Klimabricht soo schöön frisiiert.
Z‘vil Dienscht- glaagt d’Vreene voo dr Schuggerei
Säit d’Olga – bi dr BVB hämmer nie frey
Schtress au im Bus, doch eppis muesch wüsse
Bi dr BVB mien d’Fraue d’Scheffe nit küsse.
Statt Maikääfer sammle mr Tiigermüggli
Neu au Hundeschyssdrägg im Güggli
Dä hälf bim Karriereschtress – hets ghaisse
Als Scheff vom Ballett dörfsch «Schaisse» schmaisse.
Mir lyyde, hänn uff de Hüfft z viil Schpägg
Mit dr Abnähschprützi griege mr ‘s wägg
Dangg Kortison hüpfe mer in zäänte Schtogg
Uns fääle nur d’ Medis gäge Präämieschogg.
Dischtle, Moon und Kornblueme schwinde
Biodiväärs – mr mien krass Idee finde
Wo wachse die scheenschte Bluemen am Rand?
Mr bruuche meh Autobaane im Land.
Bi de Schugger – uffruume? –d’Aymaa holt ä Ziircher!
Pflanzedreeg wuechere – d’Idee stammt vo – Ziircher!
Wenn das soo wytergoot, wäär wurd do sauer?
Schacqueline Badran schtatt Cramer – das hätt scho Power!
Unsri Värs brünzle mr ohni Tschätt Tschy Py Ty
Für d’Muusig bruuche mr kai Ka Y
Dänggsch alles syg ächt – das wäär jo glacht
Mir Gratzdischtle sin – vom Drei-De-Drugger gmacht.
Underwäggs hämmer dringend – ufs Hüüsli miesse
Sin em Gschdangg gfolgt – hän äins gfunde und könne
gniessssse
Brächtigi Plättli, silbergrau und groosss
Ach soo, mir sin jo in dr Freyeschtroosss.
Quyyr und non-binäär – isch nümm verkeert
«Syg, wie de wottsch» – hämmer freudig gleert
Transtschender isch – mr häns kapiert
Wenn di beschti Fründin zum Traum-Maa wird.
Si wättere geege d’EU, d’Schwyz syg in Gfoor
«Gang rief de Bruune», singe si im Koor
D‘Martullo wird all unsri Fiind jetzt pagge
Si kämpft mit Hellebarde gäge Cyberattagge.
Kriegt s’en, kriegt s’en nit – was wird ächtsch woor?
Und si tanzen ainen Tango – voor, zrugg – und voor
Balanciere tapfer uff ganz dünnem Yys
Si ieben im Amt für ä Kulturförderpryys.
Banaanerepubligge sin undurchsichtig
Bande regiere verfilzt, dasch nit richtig
Do simmer z’Baasel vil besser draa,
S’ längt aifach ai Clän: Ay-maa.
Mr poouschte mit Schtolz dr Buuse – uff Tiktok
Knalle s’Foti vom Fudi in äigene Blog
Trotz OP blyybt unsri Naase krumm
Mir Gratzdischtle sin halt nit d’ Haidi Klumm.
2024
Damals no ganz frisch als Gundeli-Silberdischtle unterwäggs.
Vom Margrethepark zum Gundelitoor
Mit E-Bike und Trotti faare mr vor
Mr liebe dr Gieterstrossbulewaar
Und brünzle d’ Värs an dr Tellplatzbaar.
Gundeli, Gundeli, Gündeli
Mr nämme no e Ründeli.
Was uns dä Heerbscht wirgglig het gschtungge.
D Zaal vo Frauen im Parlamänt isch gsungge.
Am Polithimmel lüüchtet nur Baasel wie ne Schtäärn
Elf Fraue ziehn vo Schtadt und Land nach Bäärn.
Aber wenn d’Fraue wyter mit Karriere brilliere:
Wäär sell uns im Altershaim dennemol frisiere?
Si hän dr Urs am Barfi brutal yynegno
Är syg sicher Tail vonere Gwalt – Demo.
Verdächtig, wenn ain derart wurd ummeschtoo
Drby isch nur eewig kai Drämli koo.
Hütt finden en d’Schugger gail – ooni Zwyyfel
Är drait ebejetz Glatze und Schpringerschtiifel.
Bruun und verdoort isch’s am Birsköpfli
Do hilft au kai Departemäntsbaum im Töpfli.
Mr träume uns s’Gundeli griener und wilder
Mit Silberdischtle schtatt em Wald voll Schilder.
Doch dr Oppehaimplatz bliibt grau wie Schutt
d’Margrethebrugg – immer no kaputt.
Kai Dram kunnt – wär waartet bi der IWB?
Dr Urs! – Scho hän en wider d’Schugger gsee.
Ertappt – mit klautem Baum und Spatte – Ahaaa!
Wägem Urs het’s im Gundeli so wenig Schatte.
D’Esra het ADS, d’Mira Legaschthenie.
Unseri Änggel göön fasch alli in d’Therapie
My Luca het’s schwäär – är elläi het kai Diagnoose
Jetzt mobbt en d’Klass & är het Schiss in de Hoose.
My Kevin ka nit rächne – machts aber gäärn
Är plaant jetzt ds Büdschet vor Frau Amhärd in Bäärn.
Mr kenne nimm schloofe, luege nimm fäärnsee
Paläschtina, Sudan, Ukraine, – macht wee.
D’Fraue bi de Talibaan – D’Wältlaag isch schytter
Au positiv Dängge fiert ys nit wyter
Nüt isch meh sicher uff dere Wält
Zum Glügg hämmer bir UBS all unser Gäld.
Übrigens!
Dr Urs plant sie Lääbe nei,
Är macht jetzt d’Ussbildig bir Polizei
Bewäärte Sii gärn – Baize und Feerie – ganz frei?
Mr «rate» au dr Putzmaa, dr Pöschtler und d’Polizei.
Mr göön au ins Yoga, mer fytte und tschogge
Mr schtraffe d’Falte, tien d’Lippe botoxe
Mr quääle unsere Body ooni Ääääänd,
Will mr mit Nünzig uff Tiktok e Toprating wän.
Antibiotika im Flaisch, Peschtizid in de Boone
S Grundwasser voll – vo Kloridazoone
D’Gülle lauft in See – äs fliesse d’Subventioone
D’Buure im Root – verdopplet – ohni z’gloone
Drfür hän d’Männer kaini Schpermie, kaini Soome
Sooooo blyybe mr logger unter zää Millioone.
Bitch, Gryte, Schlampe döörfsch hütt nümm saage
Mr wän das bim Gricht yyglaage – und bim Comité
Au mit Silberhoor griegsch Abschetzigs z‘gheere
Mr dien is stachlig – und eedel weere
Aadligi Politikerinne sin für uns s‘Gröschti –
drum lieber –
Heerzog und Graaf – als Ritter mit Röschti.
Im Alter, sait me – wurde d’Mensche ganz glasse
Mr häns brobiert, könne d’News aber nit fasse.
Äs hilft kai wägluege, kai bagadellisiere
Kai Grüzfaart, und – kai brodeschdiere
Mr wänn is nit uff d Strooss glääbe vor Wuet
Ainzig Värsli brünzle – tuet ys guet.
Gundeli, Gundeli, Gündeli
Mr nämme no e Ründeli
Gundeli, Gundeli, Gündeli
Mr göön jetzt haim zum Hündeli.