Gratzdischtle

2026

„Uf em Land wirsch impotänt“, dien d Buure gryyne,
„Peschtizid in de Hoode, wie kunnt das do yyne?“
Unsri Männer in dr Schtadt hänn s Problem halt nit,
Wils z Basel jo gar käini Grienfläche mee git.

Zwai Elifante kämpfe brutal bis uf s Bluet,
Dominiere aggressiv, sin voll Hass und Wuet.
So fyys dien die Dier, die ka dr Zolli nümm haa,
Die wärde högschtens Presidänte z‘Amerika.

Halb Europa schwimmt im Summer bi uns im Rhyy,
Kaufsch Gmies uf em Märt, sin duusig Viking-Lüt drbyy.
Hesch gnue vo Turischte, vo re Druggete, wo schtaut?
Als „Ort vo dr Schtilli“ hänn s die nöii Passerelle baut.

Ai Presidänt, dä het en schoo,
Dr zwaiti, jo, dä wett en noo.
Was KI zum Nobälbryys säit, isch is ganz ney,
Gueti Schance heb als näggschts d Basler Polizey.

In knallvolle Schtaadie kämpfe Fuessballfraue,
Brilliere mit Kraft, dien vyyl Gool yynehaue.
Nur öppis fallt uf, vo grober Gwalt ghöörsch kai Doon,
Griege si drum ächt au nur – e Zääntel vom Loon?

Mr grabsche soo gärn anere gnaggige Brut,
Suuge gnüsslig an glatter und gschmaidiger Hut.
„Nai haisst nai, das haut is gar nit us de Sogge“,
Sait e prallgfüllti Diigermugge ganz drogge.

Uf em Rütli hänn si d EU-Verträg verbrennt, 
Die hänn sich wie Nazi totalitäär verrennt.
Voor Schregg sin mir Drei grad e Schnapps go dringge,
Uf em Härd hets drwyyl nach Röschti aafo stingge.

Für vyyl Fraue isch dr Partner die gröschti Gfoor,
Gwalt kunnt schlyychend, s Plakaat warnt se drvoor.
Mir finde s hilft nur ains, statt mit so Seggel z woone,
Wie bim Superblogg e ganz verkeersfreyi Zoone.

In ganz vilne Länder isch d Mainigsfreyhait doot,
Dert wird nüm diskutiert über Grien, Bruun und Root.
Wenn mir d SRG halbiere, wirds au doo ganz krass,
Dr Putin fraits und uns blybt no dr Donnschtigsjass.

Uf dr Wält zünsle Graaise, uns löschts ab,
Machtgail blyybe alli no bis ins Grab.
Schtatt die ganz Menschhait an Abgrund z‘bringe,
Selle die doch aifach ans Älplerfescht go schwinge.

Dä Müller sait, e Loon miess nit zum Lääbe länge,
E Mindeschtloon liess me sich nit ufzwänge.
Au dä will sich im Alter ooni viil Koole,
E günschtigi Pflääg us Poole könne hoole.

Mr sin wooltäätig, hälfe, wo mir nur könne,
Wän vor allem de Junge nur s‘Beschte gönne.
Drum gnagge mr E-Bikes, das macht erscht no Schpass!
Denn tüschle mr se und verschängge s Koks uf dr Gass.

E baar Buebe drangsaliere dr Pauseblatz,
Wär nit spuurt, wird gfesslet und griegt ains uf e Latz
Die brobiere nit nur allne z imponiere,
Nai, die iebe, will si schpööter mol wänn regiere.

Si faare schnälli Schlitte, sueche s grosse Gäld
Dräume vo Prinzässinne in dr Machowält.
Jede dritt jungi Maa wott Fraue so gfalle – NUR
Weli Betty goot somene Bossi in d Falle?

Är isch witzig und arrogant, dä «Goggel an der Seine»,
Zaigt digital und mit Humor de Mächtige d Zehn.
Das gfallt uns, mr gfallen ihm und wänn drum jetz goo,
Brünzle morn Värs uf X – gääge Putin und Co.